MEENA KUMARI 's Ghazals

So here presenting few of her ghazals, nazam and qataa'

* * *

yun teri rehguzar se deewanawaar guzre -

kaandhe pe rakh ke apne apna mazaar guzre..

baithe hain raaste mein' dil ka khandar sajaa kar -

shaayad isi taraf se ek din bahaar guzre..

daar-o rasan se dil tak sab raaste adhure -

jo aik baar guzre woh baar baar guzre..

behti hui ye nadiyaa, ghulte huye kinaare-

koi to paar utre koi to paar guzre..

masjid ke zer-e saaya baithe to thak thakaa kar-

bola har ek minaaraa tujh se hazaar guzre..

qurbaan is nazar pe maryam ki saadgi bhi-

saaye se jis nazar ke sokardigaar guzre..

tu ne bhi hum ko dekha, hum ne bhi tujh ko dekha-

tu dil hi haar guzra, hum jaan haar guzre..
* * *

* * ** * * * * * *

* * * * * * * *

tukde tukde din beeta, dhajji dhajji raat mili-

jis ka jitna aanchal tha, utni hi saughaat mili..
rimjhim rimjhim boondon' mein' zeher bhi hai amrit bhi-

aankhen' hans di dil roya, yeh achchi barsaat mili..

jab chaaha dil ko samjhen' hansne ki aawaaz suni-

jaise koi kehta ho le phir tujh ko maat mili..

maaten' kaisi ghaaten' kya chalte rehna aath peher-

Dil sa saathi jab paya bechaini bhi saath mili..

honton' tak aate aate jaane kitne roop bhare-

jalti bujhti aankhon' mein' saadaa si jo baat mili..

* * * * * * * * * * *

lambi lambi palkon' wale tujh par kaisa naam sajega-

lambi lambi palkon' wale tujh par aisa naam sajega..

lambi palkon' wale ne is sheher ka dil apnaya hai-

hum baithe ye soch rahe hain' us par kaisa naam sajega..

dopahar ki garmi hai aur chhaaon' neem ki thandi hai-

baith hi jaa is chhaaon' mein' pagle tujh par ye aaraam sajega..

zakhmi haathon' se thaam hi lo zakhmi haathon' ka kya kehna-

kehta hai ye har ek zakhmi mujh par har ek jaam sajega..

bin maange moti milte hain' maange se milti bheek nahin'-

chheen le aakar dil ko mere tujh par ye ilzaam sajega..

mitti ke jigar tak pahonchne ko logon' ne maathe tode hain'-

tu bhi haath mein' teeshaa le le tujh par yahi kaam sajega..

* * * * * *

udaasiyon' ne meri aatma ko ghera hai-

rupehli chaandni hai aur ghup andhera hai..

kahin' kahin' koi taara, kahin' kahin' jugnu-

jo meri raat thi wo aap ka sawera hai..

qadam qadam pe bagolon' ko todte jaayen'-

idhar se guzrega to raasta ye teraa hai..

ufaq ke paar jo dekhi hai raoshni tum se-

woh raoshni hai Khuda jane ya andhera hai..

seher se shaam hui shaam ko ye raat mili-

har aik rang samay ka bahot ghaneraa hai..

Khuda ke waaste gham ko bhi tum na behlaao-

ise to rehne do mera, yahi to mera hai..

* * * * * * * * * * * *

Ab aankh khuli ab hosh aaya - behka sa jab gulposh aaya..

patta patta ab nikhra hai - dil sa jo parda posh aaya..

aankhon' ko dekhte hi bole - bin piye koi madhosh aaya..

apna hi sauda kar baithe - tum sa jo sabaa farosh aaya..

* * * * * *

Rooh ka chehra kitabi hoga-

jism ka rang anaabi hoga..

sharbati rang se likkho aankhen'-

aur ehsaas sharaabi hoga..

chashm-e paimana se tapka aansu-

koi bechara sawaabi hoga!

* * * *

masarraton' pe rawaajon' ka sakht pehra hai-

na jaane kaun si ummeed pe dil thehra hai-

teri aankhon' mein jhalakte huye is gham ki qasam-

ae dost! dard ka rishta bahot hi gehra hai..

* * *

din guzarta nazar nahin' aata-

raat kaate nahin' kat'ti-

raat aur dil ke is tasalsul mein-

umr baante se bhi nahin' bat'ti

* * *
din baharhaal bahartaur guzar jata hai-

shaam aati hai to ajab rang liye aati hai-

aik tanhaai jo maut ki tarah khaamosh hai-

har nayi shaam nayaa bhes badal aati hai

* * *

tumhari aankhen' jo har dam sawaal karti hain-

tumhari aankhon' mein' un ka jawaab bhi to hai-

haan' ye sach hai mohabbat hi zindagi hai magar-

mere ham-shaakh mohabbat azaab bhi to hai..

* * *

teri aawaz mein' taare se kyun' chamakne lage -

kis ki aankhon' ke tarannam ko chura laayi hai-

kis ki aaghosh ki thandak pe daaka daala hai-

kis ki baanhon' se tu shabnam ko uthaa layi hai??

* * *

GHAZALS FROM FILMS..

Tum ko dekha to ye khayaal aaya-

zindagi dhoop tum ghanaa saaya..

aaj phir dil ne ek tamanna ki-

aaj phir dil ko hum ne samjhaya..

tum chale jaaoge to sochenge-

hum ne kya khoya, hum ne kya paaya..

hum jise gungunaa nahin' sakte-

waqt ne aisa geet kyun gaaya..

(Film: Saath Saath [1982], Poet: Javed Akhtar, Singer: Jagjit Singh, Music: Kuldip Singh)

Video: http://www.youtube.com/watch?v=-GRqHkV9Bls

- - - - - - - - - - - - - - - - - - - - - - -

Tum apna ranj-o gham, apni pareshani mujhe de do-

tumhein' gham ki qasam, is dil ki weeraani mujhe de do..

yeh mana main' kisi qaabil nahin' hun' in nigaahon' mein'-

bura kya hai agar, ye dukh ye hairaani mujhe de do..

main' dekhun' to sahi, duniya tumhein' kaise sataati hai-

koi din ke liye apni nigehbaani mujhe de do..

woh dil jo main ne maanga tha magar ghairon' ne paaya tha-

badi shae hai agar, uski pashemaani mujhe de do..

(Film: Shagun [1964], Poet: Sahir Ludhiyanvi, Singer: Jagjit Kaur, Music: Khayyam)

Video: http://www.youtube.com/watch?v=A8Yr1OOeOT8

- - - - - - - - - - - - - - - - - - - -

Mana Teri nazar mein' tera pyaar hum nahin'-

kaise kahen' ke tere talabgaar hum nahin'..

tan ko jalaa ke raakh banaya, bichha diya-

lo ab tumhaari raah mein' deewaar hum nahin'...

jis ko nikhara hum ne tamanna ke khoon se-

gulshan mein us bahaar ke haqdaar hum nahin'..

dhoka diya hai khud ko mohabbat ke naam par-

ye kis tarah kahen' ke gunehgaar hum nahin'..

(film: Ahista Ahista [1981], Poet: Naqsh Laelpuri, Singer: Sulakshana Pandit, Music: Khayyam)

Video: http://www.youtube.com/watch?v=siwAe4aKaTI

- - - - - - - - - - - - - - - - - - - - - - - - - - - - - - -

Phir Chhidi raat baat phoolon' ki-

raat hai ya baaraat phoolon' ki..

phool ke haar phool ke gajre-

shaam phoolon' ki raat phoolon' ki..

aap ka saath, saath phoolon' ka-

aap ki baat, baat phoolon' ki..

Phool khilte rahenge duniya mein'-

roz niklegi baat phoolon' ki..

nazren' milti hain' jaam milte hain'-

mil rahi hai hayaat phoolon' ki..

ye mehekti hui ghazal Makhdoom'-

jaise sehraa mein' raat phoolon' ki..

(Film: Baazar [1982], Poet: Makhdoom Mohiuddin, Singers: Talat Aziz & Lata Mangeshkar, Music: Khayyam)

Video: http://www.youtube.com/watch?v=meif1oIfJ5o

- - - - - - - - - - - - - - - - - - - - - -

Justju jis ki thi us ko to na paayaa hum ne-
is bahaane se magar dekh li duniyaa hum ne..

tujhko ruswa na kiya khud bhi pashemaa na huye-
ishq ki rasm ko is tarhaa nibhayaa hum ne..

kab mili thi kahaan' bichhdi thi hamein' yaad nahin'-
zindagi tujh ko to bas khwaab mein dekhaa hum ne..

ae Adaa' aur sunaayen' bhi to kyaa haal apnaa-
umr ka lamba safar tae kiya tanhaa hum ne..

(Film: Umrao Jaan [1981], Poet: Sheheryar, Singer: Asha Bhosle, Music: Khayyam)

VIDEO: http://www.youtube.com/watch?v=C_eVsiOlZ9U&feature=related
- - - - - - - - - - - - - - - - - - - - - - - - - - - - - - - -

Aapki yaad aati rahi raat bhar-
chashm-e nam muskurati rahi raat bhar..

raat bhar dard ki shamma jalti rahi-
gham ki lau thartharaati rahi raat bhar..

baansuri ki surili suhaani sadaa-
yaad ban ban ke aati rahi raat bhar..

yaad ke chaand dil mein utarte rahe-
chaandni jagmagaati rahi raat bhar..

koi deewana galiyon' mein' phirta rahaa-
koi aawaaz aati rahi raat bhar..

(Film : Gaman [1978], Poet: Makhdoom Mohiuddin, Singer: Chhaya Ganguli, Music: Jaidev)
VIDEO: http://www.youtube.com/watch?v=mlFXtzd4o38

- - - - - - - - - - - - - - - - - - - - - - - - - -

Tera hijr mera naseeb hai, teraa gham hi meri hayaat hai-

mujhe teri doori ka gham ho kyun, tu kahin' bhi ho mere saath hai..

mere waaste tere naam par koi harf aaye, nahin nahin-

mujhe khauf-e duniya nahin' magar mere rubaru teri zaat hai..

tera wasl ae meri dilruba, nahin' meri qismat to kya hua-

meri mehjabeeN' ye hi kam hai kya, teri hasraton' ka to saath hai..

tera ishq mujh par hai meherbaaN', mere dil ko haasil hai do jahaaN'-

meri jaan-e jaaN' isi baat par meri jaan jaaye to baat hai..

(film: Razia Sultan [1983], poet: Jaan' Nisar Akhtar, singer: Kabban Mirza, music: Khayyam)

VIDEO: http://www.youtube.com/watch?v=5dXfVXJBsz4

- - - - - - - - - - - - - - - - - - - - - -

"Ye aarzoo thi ke hans kar koi mila hota-

kahin' to humse kisi ka dil aashnaa hota"

Kisi ne bhi to na dekha nigaah bhar ke mujhe-

gaya phir aaj ka din bhi udaas kar ke mujhe..

sabaa bhi laayi na koi payaam apnon' ka-

sunaa rahi hai fasaane idhar udhar ke mujhe..

muaaf kije jo main' ajnabi hun' mehfil mein'-

ke raaste nahin' maaloom is nagar ke mujhe..

woh dard hai ke jise seh sakun' na keh paaun'-

milega chain to ab jaan se guzar ke mujhe..

(film: Dil Aashna Hai [1992] , poet: Majrooh Sultanpuri, singer: Pankaj Udhas, music: Anand Milind)

VIDEO: http://www.youtube.com/watch?v=4OoyHFvov78&feature=related

- - - - - - - - - - - - - - - - - - - -

Ab ranj se khushi se bahaar-o khizaaN' se kya-

mehv-e khayaal-e yaar hain' hum ko jahaan' se kya..

un ka khayaal, un ki talab, un ki aarzoo-

jis dil mein' ho wo maange kisi meherbaa se kya..

hum ne charaag rakh diya toofaan' ke saamne-

peeche hatega ishq kisi imtehaaN' se kya..

koi chale, chale na chale, hum to chal pade-

manzil ki jis ko dhun ho use kaarvaaN' se kya..

ye baat sochne ki hai wo ho ke meherbaaN'-

poochenge haal-e dil to kahenge zabaaN' se kya..

(film: Dulhan Wahi Jo Piya Man Bhaye [1977], poet & Music: Ravindra Jain, singer: Hemlata]

VIDEO: http://www.youtube.com/watch?v=1ubN8AsIYX8

- - - - - - - - - - - - - - - - - - - - - - - - - - - - - - - - - - -

Mushkil hai bahot mushkil chaahat ka bhula dena-

aasaan nahin dil ki ye aag bujha dena...

ye khel nahin' lekin ye khel hai ulfat ka-

roton' ko hansaa dena, hanston' ko rula dena..

dil walon' ki duniya mein' hai rasm ke jab koi-

aaye to qadam lena, jaye to dua dena..

uljhan hai bahot phir bhi hum tum ko na bhoolenge-

mumkin to nahin' lekin tum hum ko bhulaa dena..

(film: Mahal [1949], poet: J. Nakhshab, music: Khemchand Prakash, singer: Lata Mangeshkar)

VIDEO: http://www.youtube.com/watch?v=rk6drFfTDC8

- - - - - - -- - - - - - - - - - - -

zindagi mein jab tumhare gham nahin' the-

itne tanhaa the ke hum bhi hum nahin' the..

waqt par jo log kaam aaye hain' aksar-

ajnabi the woh mere humdum nahin the..

besabab tha tera milna rehguzar mein-

haadse har mod par kuchh kam nahin' the..

hum ne khwaabon' mein' khuda ban kar bhi dekha-

aap the baanhon' mein' do aalam nahin' the..

saamne deewar thi khuddariyon' ki -

warna raste pyaar ke pur kham nahin' the..

(film: Dooriyan [1979], poet: Sudarshan Faakir, singers: Anuradha Paudwal & Bhupinder, music: Jaidev)

- - - - - - - - - - - - - - - - - - - - - - -

Awarapan, Banjarapan, aik khalaa hai seene mein-

har dam har pal bechaini hai kaun balaa hai seene mein..

jaane ye kaisi aag lagi hai jis mein' dhuaan' na chingari-

ho na ho is baar kahin' koi khwaab jalaa hai seene mein'..

jis raste par tapta sooraj saari raat nahin' dhalta-

ishq ki aisi raah guzar ko hum ne chuna hai seene mein..

kahaaN' kisi ke liye hai mumkin sab ke liye ek sa hona-

thoda sa dil mera bura hai, thoda bhalaa hai seene mein..

(film: Jism [2003], poet: Nilesh Mishra, singer: K.K., music: M.M. Karim)

10 Muntakhib Ghazalein (10 Selected Ghazals)

An-ginat andekhe raston’ se guzarna hai mujhe-
Jab kahin’ jaa kar samandar mein utarna hai mujhe..

Mere aangan mein’ bhi ae qaus-e-qazah ek din utar-
zindagi mein’ tera ek ek rang bharna hai mujhe..

dekhta hun’ kyun’ ghane pedon’ ke saayon’ ki taraf-
jab sar-e manzil pahonch kar hi theherna hai mujhe..

mere pairon’ mein’ jo chhaale hain, woh bemasraf nahin’-
aakhir is sehra ko bhi sairaab karna hai mujhe..

kab tak aakhir main rahunga khud mein’ hi simta hua-
ek na ek din to beher soorat bikharna hai mujhe..

(Aabid Munawari)
- - - - - - - - - - - - - - - - - - - - - - -

Mila tha kal jo sar-e raah chaahaton’ ki tarah-
Theher gaya meri aankhon’ mein wehshaton’ ki tarah..

jo dil ki simt badha tha mohabbaton’ ki tarah-
simat ke reh gaya seene mein’ nafraton’ ki tarah..

use gumaan ke chaha use zamaane ne-
azeez sab ko tha lekin zarooraton’ ki tarah..

kab aashnaa-e mohabbat tha, kar gaya phir bhi-
woh mere dil pe hukumat mohabbaton’ ki tarah..

har aik mod par, har zindagi ki manzil par-
woh yaad aayega lekin shikaayaton’ ki tarah..

mohabbaton’ se bade nafraton’ ke rishte hain’-
woh mujh mein’ zinda rahega adaawaton’ ki tarah..

(Shamsul Gani)
- - - - - - - - - - - - - - - - -

Aandhi chali to naqsh-e kaf-e paa nahin’ mila..
Dil jis se mil gaya woh dubara nahin’ mila..

hum anjuman mein’ sab ki taraf dekhte rahe-
apni tarah se koi akela nahin mila..

mehr-o wafaa ke dasht nawardo jawaab do-
tum ko bhi woh ghazaal mila ya nahin’ mila..

aawaaz ko to kaun samajhta ke door door-
khaamoshiyon’ ka dard shanasa nahin’ mila..

kachche ghade ne jeet li naddi chadhi hui-
mazboot kashtiyon’ ko kinara nahin’ mila..

(Mustafa Zaidi)
--- --- --- --- --- --- --- --- --- --- --- ---

Apna dukh apna hai pyare, gair ko kyun’ uljhaoge-
apne dukh mein’ paagal ho kar ab kis ko samjhaoge..

dard ke sehra mein’ laakhon’ ummeed ke laashe galte hain’-
ek zaraa se daaman mein’ tum kis kis ko kafnaaoge..

tod bhi do ahsaas ke rishte, chhod’ bhi do dukh apnaane-
ro ro kr jeevan kaatoge, ro ro ke mar jaaoge..

raaz ki baat ko khaamoshi ka zeher samajh kar pee jana-
kehne se bhi reh na sakoge, keh kar bhi pachhtaaoge..

aaj yahaan’ pardon’ se udhar uryaani hi uryaani hai-
tum bhi nange ho kar naacho, yun’ kab tak sharmaaoge..

(Akhtar Imaam’ Rizvi)

- - - - - - - - - - - - - - - - - - - - - - - -

rang baatein karen’ aur baaton’ se khushboo aaye-
zakhm phoolon’ ki tarah mehke agar tu aaye..

bheeg jaati hain’ is ummeed par aankhen’ har raat-
shaayad is raat wo mehtaab lab-e ju aaye..

hum teri yaad se katra ke guzar jaate magar-
raah mein’ phoolon’ ke lab saayon’ ke gesu aaye..

wahi lab-tashnagi apni, wahi targeeb-e saraab-
dasht-e maaloom ki hum aakhri hadd chu aaye..

seene weeran huye anjuman aabaad rahi-
kitne gul chehra gaye, kitne pari ru aaye..

aazmaaish ki ghadi se guzar aaye to Zia’-
jashn-e gham jaari hua aankh se aansu aaye..

(Zia’ Jalandhari)

- - - - - - - - - - - - -

Main ne roka bhi nahin’ aur who thehra bhi nahin-
haadsa kya tha jise dil ne bhulaya bhi nahin..

jaane walon’ ko kahaan’ rok sakaa hai koi-
tum chale ho to koi rokne wala bhi nahin..

door-o nazdeek se uthta nahin’ shor-e zanjeer-
aur sehra mein’ koi naqsh-e kaf-e paa bhi nahin..

benayazi se sabhi qarya-e jaa’ se guzre-
dekhta koi nahin’ hai ke tamaasha bhi nahin..

wo to sadiyon’ ka safar kar ke yahaan’ pahoncha tha-
tu ne munh pher ke jis shakhs ko dekha bhi nahin..

kis ko neerangi-e ayyaam ki soorat dikhlaayein’-
rang udta bhi nahin’, naqsh theherta bhi nahin’…

(Aslam Ansari)
---- - - - - - - - - - - - ----

Un se bhi apna saath nibhaya nahin’ gayaa-
adnaa sa aik baar uthaya nahin’ gaya..

roz-e azal se ahl-e jafaa sargaram rahe-
naqsh-e wafaa jahaan’ se mitaya nahin’ gaya..

sab kuchh bhula diya hai gham-e rozgaar ne-
lekin kisi ka pyaar bhulaya nahin’ gaya..

gardan utaar di gayi karbal ki rait par-
baatil ke aage sar ko jhukaaya nahin’ gaya..

muddat hui ke dil ne koi aarzoo na ki-
palkon’ pe koi khwaab sajaaya nahin’ gaya..

Ahsaan’ kyun wo baith gaye dil ko thaam ke-
Aisa to koi she’r sunaaya nahin’ gaya..

(Ahsaan Siwani)

- - - - - - - - - - - - - - - - - -

Zindagi se yahi gila hai mujhe-
Tu bahot der se mila hai mujhe..

Tu mohabbat se koi chaal to chal-
Haar jaane ka hausla hai mujhe..

Dil dhadakta nahin’ tapakta hai-
Kal jo khwahish thi aabla hai mujhe..

Humsafar chaahiye, hajoom nahin’-
Ek musaafir bhi qaafla hai mujhe..

Kaun jaane ke chaahaton’ mein’ Faraaz’-
Kya ganwaya hai kya mila hai mujhe..

Labkusha hun’ to is yaqeen ke saath-
qatl hone ka hausla hai mujhe..

kohkan ho ke Qais ho ke Faraaz’
sab mein’ ek shakhs hi mila hai mujhe..

(Ahmed Faraaz’)

'Zindagi se yahi gila hai mujhe..' by Ghulam Ali:

http://www.youtube.com/watch?v=bwQopboRH5s

-- - - - - - - - - - - - - - - - - - -

Sach hai ke apna rukh bhi badalna pada mujhe-
main' qaafile ke saath tha chalna pada mujhe..

bewajah dil ko thi naye manzar ki justju-
benaam mausamon’ se behelna pada mujhe..

kuchh mere kaam aa na saki waza-e ahtiyaat-
sholon’ se door reh ke bhi jalna pada mujhe..

dast-e talab daraaz to sadiyon’ se hai magar-
kuchh baat thi ke aaj machalna padaa mujhe..

kitna badaa hujoom tha mere liye Shamim’-
kis khamushi ke saath nikalna pada mujhe..

(Shamim’ Farooqui)

- - - - - - - - - - - - - - - - - -

Lutf ka rabt hai koi na jafaa ka rishta-
Dil se kuchh aur hai zaalim ki anaa ka rishta..

Dast-e iiesa bhi wahi, panja-e qaatil bhi wahi-
Kitna naazuk hai charaagon’ se hawaa ka rishta..

Jabr-e haalaat kaho, gham ki makaafaat kaho-
Toot bhi jata hai honton’ se nawaa ka rishta..

Sochiye to sabhi apne hain’ koi ghair nahin’-
haakim-e sheher se hai jurm-o sazaa ka rishta..

manzar-e zeest mein’ kuchh rang-e nau bhar deta hai-
khaarzaaron’ se kisi aablaa paa ka rishta..

kya karen’ rasm-e zamana ki shikaayat Taabaa’-
dard se rakhte hain’ hum log sadaa ka rishta..

(Ghulam Rabbani Taabaan’)
- - -- - - - - -

jab kabhi koi qadam main ne badha kar - Rasheeda Ayaan'

jab kabhi koi qadam main' ne badhha kar rakkha-

us ne ek sang-e giraaN' raah mein' laa kar rakkha..

go inaayat ki baarish mein bhigoya, lekin-

haq to ye hai ke mera haq na baraabar rakkha..

warq-e zeest padhe mere kitaabon' ki taraah-
apna deebacha-e hasti bhi chhupa kar rakkha..

dhoop mein chalte huye zaaviye tabdeel kiye-
apna saaya na mere qad ke baraabar rakkha..

ikhtiyaar us ne rakhe apni hi tahveel mein' sab-

mujh ko tasveer ki maanind sajaa kar rakkha..

wo shehenshah hai is daur ka jis ne sab ko-
bheek khwaabon' ki ataa kar ke gadaagar rakkha..

woh ujaalon' ka payambar hai ke jis ne taa-umr -

pyaar ka deep Ayaan' dil mein' jalaa kar rakkha..

(Rasheeda Ayaan')

Woh jo hum mein tum mein qaraar tha - Momin Khan Momin

Woh jo hum mein’ tum mein’ qaraar tha, tumhein’ yaad ho ke na yaad ho-
Wahi yaani waada nibaah ka, tumhein’ yaad ho ke na yaad ho..

Woh jo lutf mujh pe the peshtar, woh karam ke tha mere haal par-
Mujhe sab hai yaad zara zara, tumhein’ yaad ho ke na yaad ho..

woh naye gile woh shikaayatein’, woh maze maze ki hikaayatein-
woh har aik baat pe roothna, tumhein’ yaad ho ke na yaad ho..

kabhi baithe sab mein’ jo ru-ba-ru, to ishaaraton’ se hi guftagu-
woh bayaan shauq ka barmalaa, tumhein’ yaad ho ke na yaad ho..

koi baat aisi agar hui, ke tumhare ji ko buri lagi-
to bayaan’ se pehle hi bhoolna, tumhein’ yaad ho ke na yaad ho..

kabhi hum mein’ tum mein’ bhi chaah thi, kabhi hum se tum se bhi raah thi-
kabhi hum bhi tum bhi the aashna, tumhein’ yaad ho ke na yaad ho..

suno! zikr hai kai saal ka, ke kiya aap ne ek waadaa tha-
so nibaahne ka to zikr kya, tumhein’ yaad ho ke na yaad ho..

jise aap ginte the aashnaa, jise aap kehte the baawafaa-
main’ wahi hun’ Momin’ mubtala, tumhein’ yaad ho ke na yaad ho..

(Momin Khan’ Momin’)

Chadhte dariya se bhi gar paar - Makhmoor Saeedi

Chadhte dariya se bhi gar paar utar jaaoge-

paun rakhte hi kinare pe, bikhar jaaoge..

waqt har raah mein deewar khadi kar dega-

waqt ki qaid se ghabra ke jidhar jaoge..

khana-barbaad samajh kar hamein' dhalti hui raat-

tanz se poochhti hai, kaun se ghar jaaoge?

main' bhi saaya hun' siyah raat mein' kho jaaunga-

tum bhi ek khwaab ho, pal bhar mein' bikhar jaaoge..

raaste sheher ke sab band huye hain tum par-

ghar se nikloge to Makhmoor' kidhar jaaoge..

(Makhmoor Saeedi)

Ae Mohabbat tere anjaam pe rona aaya- Shakeel Badayuni

Ae Mohabbat tere anjaam pe rona aaya-

jaane kyun' aaj tere naam pe rona aaya..

yun' to har shaam ummeedon' mein' guzar jaati hai-

aaj kuchh baat hai jo shaam pe rona aaya..

kabhi taqdeer ka maatam, kabhi duniya ka gila-

manzil-e ishq mein' har gaam pe rona aaya..

mujh pe hi khatm hua silsila-e nohaa gari-

is qadar gardish-e ayyam pe rona aaya..

jab hua zikr zamaane mein masarrat ka Shakeel'-

mujh ko apne dil-e naakaam pe rona aaya..

- Shakeel Badayuni -

(1916-1970)

This ghazal is also sung by Begum Akhtar, which became one of her most famous ghazals.
http://www.youtube.com/watch?v=_BteqVSAowA&feature=related


also sung by Khushboo Khanam:
http://www.youtube.com/watch?v=EUQzjqPYpa4&feature=related

Neeyat-e shauq bhar na jaaye kahin - Nasir Kazmi

***

Neeyat-e-Shauq bhar na jaaye kahin'-

tu bhi dil se utar na jaaye kahin'..

aaj dekha hai tujh ko der ke baad-
aaj ka din guzar na jaaye kahin'..

na mila kar udaas logon' se-
husn tera bikhar na jaaye kahin'..

aarzoo hai ke tu yahaan' aaye-
aur phir umr bhar na jaaye kahin'..

ji jalaata hun' aur ye sochta hun'-
raaegaan' ye hunar na jaaye kahin'..

aao kuchh der ro hi lein Naasir'-
phir ye dariya utar na jaaye kahin..

Nasir Kazmi
(1925-1972)

***

This ghazal is also sung by:

Asha Bhosle..

http://www.youtube.com/watch?v=GnH0_BVOr70

Noorejehan:

http://www.youtube.com/watch?v=LTg-sERhTy4

Ghulam Ali:

http://www.youtube.com/watch?v=1-JlBcVrYGk

Mujh se mera kya rishta hai - Mumtaz Rashid

***

Mujh se mera kya rishta hai, har aik rishta bhool gayaa-

itne aaine dekhe hain' apna chehra bhool gayaa..

ab to ye bhi yaad nahin' hai farq tha kitna dono mein'-
us ki baatein yaad rahin', uska lehjaa bhool gayaa..

pyasi dharti ke hon'ton' par mera naam nahin' to kya-
main woh baadal ka tukdaa hun' jis ko dariya bhool gayaa..

duniya wale kuchh bhi kahen', Raashid' apni majboori hai-
us ki gali jab yaad aai hai, ghar ka rastaa bhool gayaa...

(Mumtaz Rashid)

This ghazal is also sung by Punkaj Udhas:

http://www.youtube.com/watch?v=bZev4MfGFcM